820 ushtarë të Forcës së Sigurisë së Kosovës kanë realizuar në poligon portretin e Komandantit Legjendar Adem Jashari.
Kjo është bërë në prag të Epopesë së UÇK’së dhe 5 Marsit-Ditës së Kazermës “Adem Jashari.
Në vigjilje të Epopesë së UÇK-së dhe 5 Marsit, Ditës së Kazermës “Adem Jashari”, 820 ushtarë të FSK-së kanë realizuar portretin e Komandantit Legjendar Adem Jashari. Në videon e publikuar nga vetë Ministria e Mbrojtjes së Republikës së Kosovës shihet se si ushtarët realizojnë në poligon portretin e Komandantit. Portreti është bërë në poligonin e kazermës, ideuar nga piktori Besart Gashi dhe realizuar nga nënoficeri, Vesel Raçi.
Kujtojmë që më 4 dhe 5 mars të vitit 1998, regjimi serb i Sllobodan Millosheviç-it ndërmari një sulm të gjerë në Prekaz të Drenicës, për të shfarosur Ushtrinë Çlirimtare të Kosovës (UÇK), përkatësisht drejtuesin e saj, komandantin Adem Jashari. Kjo betejë u kthye në gurin që themeloi lirinë e shtetit të Kosovës.
